काठमाडौँ । हिमालयन रिइन्स्योरेन्स कम्पनीको आइपीओमा पहिलो दिनमै आवेदनको आइरो लागेको छ ।
सिडिएसका अनुसार आज अर्थात् मङ्सिर २७ गते साँझ ५ः०३० बजेसम्म ३ लाख ३७ हजार ९६४ जना माथि आवेदकले १ अर्ब २४ करोड २३ लाख ४० हजार ६८० रुपैयाँ बराबरको ६० लाख ३० हजार ७८० कित्ताका लागि आवेदन दिएका हुन् ।
आज मङ्सिर २७ गतेबाट प्रिमियम मूल्यमा आइपीओ बिक्री खुला गरेको कम्पनीले पहिलो चरणमा वैदेशिक रोजगारीमा रहेका नेपालीका लागि आइपीओ बिक्री गरेपछि सर्वसाधारणका लागि साधारण शेयर जारी गरेको हो ।
कम्पनीले ३ करोड कित्ता आइपीओ निष्काशनको अनुमति पाएको थियो। त्यसमध्ये वैदेशिक रोजगारीमा रहेका नेपालीलाई १० प्रतिशतले हुन आउने ३० लाख कित्ता आइपीओ बिक्री गरिसकेको छ।
कम्पनीले कुल कित्ताको २ प्रतिशतले हुन आउने ६ लाख कित्ता कम्पनीमा कार्यरत कर्मचारीलाई र ५ प्रतिशतले हुन आउने १५ लाख कित्ता सामूहिक लगानी कोषलाई छुट्टाएको छ। अब बाँकी रहेको २ करोड ४९ लाख कित्तामा सर्वसाधारणले खरिद आवेदन दिन पाउनेछन्।
लगानीकर्ताले नेपाल धितोपत्र बोर्डबाट अनुमति प्राप्त सी–आस्बा सेवामा सहभागी बैंक तथा वित्तीय संस्था र तिनले तोकेका शाखा कार्यालयहरु तथा सीडीएससीको मेरो सेयरबाट अनलाइन आवेदन दिन सक्नेछन्। यो आइपीओको निष्कासन बन्द छिटोमा पुस १ गते र ढिलोमा पुस ११ गते बैंकिङ समयपछि हुनेछ।
