प्राधिकरणलाई रोयल्टी नबुझाउने ६१ इन्टरनेट सेवा प्रदायकको नाम सार्वजनिक

काठमाडौँ – नेपाल दूरसञ्चार प्राधिकरणले रोयल्टी नतिरेका तथा ग्रामीण दूरसञ्चार विकास कोष रकम दाखिला नगर्ने ६१ इन्टरनेट सेवा प्रदायक कम्पनीको सूची सार्वजनिक गरेको छ।

आज (मंगलबार) कम्पनीले एक सूचना जारी गर्दै रोयल्टी नतिरेका कम्पनीहरूको नाम सार्वजनिक गरेको हो । प्राधिकरणले अनुमतिपत्र प्राप्त सेवा प्रदायक कम्पनीहरूले रोयल्टी र ग्रामीण दूरसञ्चार विकास कोष बापतको रकम गत पौष मसान्तभित्र बुझाउन यसअघि नै पत्राचार गरेको थियो ।

गत आर्थिक वर्ष २०७९/८० को अडिटेड वित्तीय विवरण र सो विवरणअनुसार कम्पनीहरूले कुल आम्दानीको ४ प्रतिशतले हुने रोयल्टीबापतको रकम र २ प्रतिशतले ग्रामीण दूरसञ्चार विकास कोषबापतको रकम प्राधिकरणलाई बुझाउनुपर्ने हुन्छ । तर, अटेर गरी हालसम्म पनि रकम दाखिला नगरेको प्राधिकरणले जनाएको छ ।

मन्त्रालयमा दाखिला गरेको रोयल्टी रकमको भौचर र यस प्राधिकरणको खातामा दाखिला गरेको रकमको भौचर र अडीटेड वित्तीय विवरणसहित प्राधिकरणमा अनिवार्य रूपमा दर्ता गरी जानकारी गराउन समेत सूचना मार्फत उल्लेख गरिएको छ ।