काठमाडौँ। प्रधानमन्त्री केपी शर्मा ओलीले अहिलेको सरकार भ्रष्टाचार गर्न नभएर समृद्ध नेपाल निर्माण गर्न बनेको जनाएका छन् ।
एमालेका अध्यक्ष समेत रहेका प्रधानमन्त्री ओलीले काठमाडौँमा आयोजित जागरण सभालाई सम्बोधन गदै अहिलेको सरकारलाई हल्लाउन अनेकौँ प्रयास भइरहेको भए पनि त्यसो हुन नदिने बताएका छन् ।
उनले एमालेलाई कसैले हल्लाउन नसक्ने भन्दै विरोधीहरूलाई भने, ‘तपाइहरू एमालेप्रति औला उठाउँदै हुनुहुन्छ, साँचै बहस गर्न सक्नुहुन्छ । तथ्य प्रमाणको आधारमा बहस गर्न सक्नुहुन्छ ?
भन्दिए त भो नि, कम्बोडियामा ३२ हजार करोड, २१ हजार करोड स्विस बैंकमा, तपाइहरू हेर्न जान सक्नुहुन्न, भन्दिए भो। अमेरिकाका बैंकको आधा सम्पत्ति मेरै हो भन्देउन् । भन्दिनका लागि, फाल्तु कुरा गर्नुको अर्थ छैन ।’
उनले अर्थतन्त्रलाई ध्वस्त बनाएर अराजकता मच्चाउने प्रयास भइरहेको बताए । साथै फरक प्रसङ्गमा बोल्दै प्रधानमन्त्री ओलीले ८४ को निर्वाचनसम्म वर्तमान समीकरण कायम रहने बताएका छन्। ओलीले आफू ०८३ असारसम्म प्रधानमन्त्री रहने र त्यसपछि कांग्रेस सभापति शेरबहादुर देउवालाई जिम्मा लगाउने स्पष्ट पारेका छन् ।
