काठमाडौँ । राष्ट्रिय स्वतन्त्र पार्टीका सभापति रवि लामिछानेको बहस बुधवारका लागि सकिएको छ । सहकारी ठगी प्रकरणमा रविसहित ३२ जनाविरुद्ध दायर भएको मुद्दामा आजदेखि बहस सुरु भएको हो।
बुधवार चितवन जिल्ला अदालतमा जाहेरवालाको तर्फबाट १ जना र सरकारी वकिलतर्फबाट ३ जना गरेर ४ जनाले बहस गरेका छन् ।
सरकारी वकिलका तर्फबाट जिल्ला महान्यायाधिवक्ता रवि न्यौपाने, सहन्यायाधिवक्ता अमृत सुवेदी र बुद्धबहादुर थापाले बहस गरेका हुन् भने जाहेरवालाको तर्फबाट अधिवक्ता रमेश काफ्लेले बहस गरेको चितवन जिल्ला अदालतका सूचना अधिकारी अमृत विश्वकर्माले आर्थिक भ्वाइसलाई जानकारी दिएका छन् ।
सहारा बचत सहकारीको थुनछेक बहस नसकिएपछि जिल्ला अदालत चितवनका न्यायाधीश दयाराम ढकालको इजलासले लामिछानेलाई जिल्ला प्रहरी कार्यालय चितवनको हिरासतमा पठाइएको हो । बिहीबार सरकारी वकिल ३ जना थपिने र रवि लामिछानेको तर्फबाट १० जनाले बहस गर्ने विश्वकर्माको भनाई छ ।
