काठमाडौं । नेपाल धितोपत्र बोर्डले हरित बण्ड लगायतका नवीन वित्तीय औजार निष्कासनका लागि आवश्यक नीतिगत व्यवस्था गर्ने भएकाे छ । बोर्डले आर्थिक वर्ष २०८०/८१ को लागि नीति तथा कार्यक्रम सार्वजनिक गर्दै हरित बण्ड लगायतका नवीन वित्तीय औजार निष्कासन गर्न आवश्यक नीति, नियम तथा निर्देशिका संशोधन तथा तर्जुमा गर्ने घोषणा गरेको हो ।
यस्तै विगतका वर्षहरुमा जस्तै यस वर्ष पनि धितोपत्रको दोस्रो बजारमा गैर आवासीय नेपालीहरूका लगानी खुला गर्न धितोपत्र सम्बन्धी कानुनहरूमा आवश्यक संशोधन तथा परिमार्जन विषयले बोर्डको नीति तथा कार्यक्रममा निरन्तरता पाएको छ ।
बोर्डले धितोपत्र व्यवसायीका लागि संस्थागत सुशासन सम्बन्धी निर्देशिका तर्जुमा गरी लागू गर्ने बताएको छ । साना तथा मझौला कम्पनीको धितोपत्र निष्कासन तथा कारोबार सम्बन्धी नियामावली तयारी गरी कार्यावन्यनमा ल्याउन घोषणा गरेको छ । बोर्ड नियमावलीको मस्यौदा तयार गरेर सरोकारवालाको सुझाव समेतको आधारमा नियमावली स्वीकृतिका लागि अर्थ मन्त्रालयमा पठाएको छ ।
बोर्डको नीति तथा कार्यक्रममा भनिएको छ, ‘वस्तु विनियम बजार सम्बन्धी वस्तु कारोबार व्यवसाय, राफसाफ तथा फर्स्यौट, वेयर हाउस सम्बन्धमा आवश्यक नीति नियम तथा निर्देशिका तर्जुमा गरिनेछ ।’
