काठमाडौं। नेपालको कम्युनिस्ट आन्दोलन र विद्यार्थी राजनीतिमा लामो समयदेखि सक्रिय नेता हिमाल शर्माले आफ्नो जीवनलाई संघर्ष, नेतृत्व र वैचारिक दृढताको प्रतीक बनाएका छन्।
पञ्चायतकालदेखि वर्तमान निर्वाचनसम्म फैलिएको उनको राजनीतिक यात्रा केवल व्यक्तिगत कथा मात्र होइन, राज्यसत्तासँगको प्रतिरोध, वैचारिक दृढता र निरन्तर आन्दोलनको जीवित दस्तावेज हो। यही कारण उनलाई ‘जिउँदा सहिद’ भनेर चिनिन्छ।
हिमाल शर्माको पञ्चायतकालीन संघर्ष
बागलुङ जिल्लाको जैमिनीमा जन्मिएका शर्माले किशोरावस्थादेखि नै बामपन्थी विचारधारामा आकर्षित भएर राजनीतिक चेतना विकास गरे। पञ्चायत व्यवस्थाविरुद्धको आन्दोलनमा सक्रिय रहेकाले उनी २०४३ सालमा पहिलो पटक जेल परे।
त्यसपछि २०४८, २०५१, २०६१ र २०६३ सालमा पटक–पटक पक्राउ परेका उनले करिब एक दशक जेल र भूमिगत जीवन समेत बिताए। यस समयमा उनले राज्यसत्तासँगको प्रतिरोध, वैचारिक दृढता र राजनीतिक अनुभवलाई झनै परिपक्व बनाएका थिए।
जेल र भूमिगत जीवनले उनलाई अनेक चुनौती र संघर्षहरु दियो तर हिमाल शर्मा हिमाल जस्तै अडिग भएर क्रान्तीमा होमिए। जेल र भूमिगत जीवनका अनुभव संगाल्दै उनी नेतृत्व र रणनीतिमा परिपक्व बन्दै अगाडी बढे।
विद्यार्थी राजनीतिमा उदय र नेतृत्व
२०५० देखि २०६० को दशकमा शर्मा अखिल नेपाल राष्ट्रिय स्वतन्त्र विद्यार्थी युनियन (क्रान्तिकारी) मार्फत विद्यार्थी राजनीतिमा सक्रिय भए। महासचिव हुँदै अध्यक्ष पदसम्म सम्हालेका उनले विद्यार्थी आन्दोलनलाई नयाँ दिशा र संगठनात्मक मजबुती दिएका थिए।
२०६५ सालमा त्रिभुवन विश्वविद्यालय, कीर्तिपुर क्याम्पसको स्ववियु सभापति निर्वाचित हुनु उनको विद्यार्थी राजनीतिको ठूलो उपलब्धि थियो। उनी विद्यार्थीहरुमाझ लोकप्रिय नेता थिए।
‘जिउँदा सहिद’ शर्मा
जनयुद्धकालमा पक्राउ परेका शर्मालाई भैरवनाथ गण (शिवपुरी ब्यारेक)मा २७ महिना ५०० दिनभन्दा बढी बेपत्ता राखिएको थियो। आँखामा पट्टी बाँधेर, हातखुट्टा बाँधेर गरिएको यातनाले अन्तर्राष्ट्रिय मानवअधिकार मञ्चसम्म ध्यानाकर्षण गरायो।
२००५ डिसेम्बरमा सर्वोच्च अदालतले अवैधानिक हिरासत ठहर गर्दै रिहा आदेश दिएपछि शर्मा सार्वजनिक भए। यही संघर्षले उनलाई ‘जिउँदा सहिद’को उपनाम दिलायो। उनको अनुभव केवल व्यक्तिगत पीडा नभई नेपालको राजनीतिक आन्दोलनको संस्मरण र चेतना पनि बनेको छ।
पार्टी नेतृत्व र सक्रियता
शान्ति प्रक्रियापछि शर्मा नेकपा (माओवादी केन्द्र)का केन्द्रीय सदस्य, पोलिटब्युरो सदस्य र काठमाडौं जिल्ला अध्यक्ष बने। २०७१ सालमा एकीकृत नेकपा (माओवादी)को काठमाडौं जिल्ला अध्यक्षमा सर्वसम्मत निर्वाचित भए।
उनले भ्रष्टाचारविरुद्धको अभियान, संगठन एकता, सुशासन र युवा नेतृत्वमा जोड दिए। उनका कदमहरूले पार्टी नेतृत्वमा नयाँ पुस्तालाई अघि ल्याउन उल्लेखनीय भुमिका समेत खेलेको छ।
निर्वाचन र युवा प्रतिनिधित्व
हाल नेपाली कम्युनिस्ट पार्टी (नेकपा)का केन्द्रीय तथा पोलिटब्युरो सदस्य र काठमाडौं जिल्ला अध्यक्ष रहेका शर्माले २०७० सालमा पहिलो पटक काठमाडौं क्षेत्र नम्बर ६ बाट प्रतिनिधि सभा उम्मेदवारी दिए।
२०८२ को निर्वाचनमा उनी दोस्रो पटक तारा चिन्हमा उम्मेदवार बनेका छन्। पार्टीले उनलाई पुस्तान्तरण र युवा प्रतिनिधित्वको योद्धाको रूपमा अघि सारेको छ।
वर्तमानमा उनले घरदैलो, टोलसभा र सामाजिक सञ्जाल अभियानमार्फत प्रचार तीव्र बनाएका छन्। उनका अभियानहरू युवा सशक्तिकरण, सुशासन, दिगो विकास, रोजगारी, शिक्षा र स्वास्थ्य सुधारमा केन्द्रित छन्।
नेपाली राजनीतिमा शर्माको आवश्यकता
हिमाल शर्माको राजनीतिक यात्रा संघर्षबाट नेतृत्वसम्मको कथा हो। पञ्चायतकालीन जेलदेखि विद्यार्थी आन्दोलन, जनयुद्धकालीन यातना र पार्टी नेतृत्वसम्मको यात्राले नेपाली राजनीतिमा उनको आवश्यकता तथा महत्व दर्शाउँछ। शालीन, वैचारिक र क्रान्तिकारी नेतृत्वको प्रतीक बनेका उनी समर्थकहरूले संसदमा देख्न चाहेका नेता हुन्।
उनको जीवन र यात्रा युवापुस्ताको प्रतिनिधित्व, दिगो विकास र सुशासनको प्रेरणादायी उदाहरण बनेको छ। आगामी निर्वाचनमा उनको सफलता नेपालका युवा राजनीतिज्ञका लागि नयाँ मानक स्थापित गर्ने सम्भावना राख्छ।
