काठमाडौं । अबको २/४ दिनमै शेयर मार्केटले एउटा नयाँ फेज ल्याउने र केही समयमै मार्केट सहज हुँदै जाने नेपाल इन्भेस्टर्स फोरमका निवर्तमान अध्यक्ष तथा बजारका अग्रज लगानीकर्ता छोटेलाल रौनियारले बताएका छन् । टेक्निकल रुपमा शेयर मार्केट घट्ने ठाउँ अब नभएको भन्दै उनले अब छिट्टै बजार उकालो लाग्दै जाने बताएका हुन् ।
‘सबै कुरा पोजेटिभ छ अब शेयर मार्केट उकालो लाग्छ, ढुक्क भएर लगानी गर्नुहोस् ।’ आर्थिक भ्वाइससँग कुरा गर्दै उनले भने, ‘कोभिडको समयदेखि लगभग ५६/५७ लाख व्यक्तिहरू डिम्याटमा आएका हु्न् ।, डिम्याटमा आएका सबै लगानीकर्ताहरूमा परिपक्कता नभएका कारण पनि समस्या आएको छ, उनीहरू अपरिपक्क छन् ,आवेशमा आउँछन् , उचालिन्छन् पछारिन्छन् , जसले जता घुमायो त्यतै घुमिदिन्छन् , धैर्यता छैन , आत्तिने र मात्तिने बानीले यस्तो भएको हो ।’
कम्पनीको दोष र गुण हेरेर लगानी गर्ने हो। फण्डामेन्टल बजार राम्रो छ। राम्रो ठाउँमा लगानी गरेका छौँ भने आत्तिनु हुँदैन रौनियारले भने । सबैलाई समेट्ने खालको मौद्रिक नीति नआएकाले शेयर मार्केट खस्किँदो अवस्थामा रहेको समेत रौनियारले बताए । ‘ मौद्रिक नीतिमा लगानीकर्ताको पनि केही आशा थियो। सबैलाई समेट्ने गरी,ब्याजदर घट्ने गरी, जोखिम भार १५० को १०० गर्ने गरी आउला भन्ने थियो ।’ उनले भने, ‘ आयो पनि ,तर त्यसको केही बेरमा गभर्नर ज्युले पत्रकार सम्मेलन गरेर फरक तथा नेगेटिभ कुरा गरिदिएकाले लगानीकर्ता अलमलमा परेका हुन् ।’
