काठमाडौं । एभरेष्ट कलर लिमिटेडले सर्वसाधारणका लागि प्रारम्भिक सार्वजनिक निष्काशन (आईपीओ) खुलाउने तयारी गरेको छ। कम्पनीले जेठ २२ गतेदेखि सर्वसाधारण लगानीकर्ताका लागि सेयर बिक्री खुला गर्ने जनाएको छ।
यसअघि पहिलो चरणअन्तर्गत वैदेशिक रोजगारीमा रहेका नेपालीहरूलाई छुट्याइएको सेयर वितरण गरिसकिएको छ। अब बाँकी सेयर सर्वसाधारणका लागि निष्काशन गर्न लागिएको हो।
कम्पनीले कुल ३० करोड रुपैयाँ जारी पूँजीमध्ये २६.३३ प्रतिशत बराबर ७ करोड ९० लाख रुपैयाँको आईपीओ जारी गर्न स्वीकृति पाएको छ। यसअनुसार १०० रुपैयाँ अंकित मूल्यका ७ लाख ९० हजार कित्ता सेयर निष्काशन गरिनेछ।
यसमा केही हिस्सा संस्थागत तथा कर्मचारीका लागि छुट्याइएको छ। सामूहिक लगानी कोषका लागि ५ प्रतिशत अर्थात् ३९ हजार ५०० कित्ता र कर्मचारीका लागि २ प्रतिशत अर्थात् १५ हजार ८०० कित्ता सुरक्षित गरिएको छ। बाँकी ६ लाख ५५ हजार ७०० कित्ता सर्वसाधारणले आवेदन दिन सक्नेछन्।
लगानीकर्ताले न्यूनतम १० कित्ता र अधिकतम १० हजार कित्तासम्म आवेदन दिन सक्नेछन्। निष्काशन छिटोमा जेठ २७ गतेसम्म र ढिलोमा असार ५ गतेसम्म खुला रहनेछ। यस आईपीओको निष्काशन तथा बिक्री प्रबन्धक मुक्तिनाथ क्यापिटल लिमिटेड रहेको छ।
