काठमाडौं। अमेरिकी राष्ट्रपति डोनाल्ड ट्रम्प र नेसनल गभर्नर्स एसोसिएसन (एनजीए) बीच फेब्रुअरी २०, २०२६ मा हुने भनिएको औपचारिक भेटघाट अन्ततः नहुने भएको छ।
ह्वाइट हाउसले कार्यक्रममा रिपब्लिकन गभर्नरहरूलाई मात्र निम्तो दिने र डेमोक्र्याटिक पक्षलाई समावेश नगर्ने संकेत गरेपछि एनजीएले उक्त कार्यक्रम आफ्नो आधिकारिक तालिकाबाट हटाएको हो।
जानकारी अनुसार मेरिल्यान्डका गभर्नर वेस मोर र कोलोराडोका गभर्नर जेरेड पोलिसलाई ह्वाइट हाउसमा आयोजना हुने रात्रिभोजमा सहभागी हुन नदिइने भएको छ। यस निर्णयको विरोधस्वरूप १८ जना डेमोक्र्याटिक गभर्नरहरूले सामूहिक रूपमा बहिष्कार गर्ने बताएका छन्।
एनजीएका अध्यक्ष केभिन स्टिटले संस्थाले सबै ५५ राज्य तथा क्षेत्रका गभर्नरहरूको प्रतिनिधित्व गर्ने भएकाले कुनै एक दल विशेषलाई मात्र प्राथमिकता दिने कार्यक्रमसँग सहमत हुन नसक्ने स्पष्ट पारे।
यता ह्वाइट हाउसले भने राष्ट्रपतिलाई पाहुना छनोट गर्ने पूर्ण अधिकार हुने तर्क गर्दै आफ्नो निर्णयको बचाउ गरेको छ।
