काठमाडौं । हुण्डी तथा क्रिप्टो कारोबारमा संलग्न रहेको आशंकामा प्रहरीले दुई जनालाई नगदसहित नियन्त्रणमा लिएको छ। उनीहरूबाट करिब १ करोड १६ लाख रुपैयाँ बरामद भएको प्रहरीले जनाएको छ।
प्रहरीका अनुसार नागार्जुन नगरपालिका–८ भीमढुंगाबाट सोही स्थानका २८ वर्षीय सागर गिरी र २८ वर्षीय प्रमोद प्रसाद धिताल पक्राउ परेका हुन्।
पक्राउ परेका व्यक्तिहरूको साथबाट विभिन्न बैंकका अलग–अलग व्यक्तिको नाममा रहेका ३ वटा चेकबुक, अन्य व्यक्तिको नाममा जारी गरिएको २७ लाख ३० हजार रुपैयाँ बराबरका ३ वटा चेक तथा विभिन्न बैंकका ४ वटा एटीएम कार्ड फेला परेको प्रहरीले जनाएको छ।
त्यस्तै, उनीहरूसँगबाट एक थान नागरिकता, दुई वटा चारपाङ्ग्रे र एक वटा दुईपाङ्ग्रे सवारी साधन, एक सवारी दर्ता किताब तथा विभिन्न कम्पनीका ६ वटा मोबाइल फोन पनि बरामद गरिएको छ।
यसका अतिरिक्त ३१ वटा एनसेल र एनटीसीका सिमकार्ड, एक कम्प्युटर र क्रिप्टो प्लेटफर्ममा रहेको ७ हजार १७५.३४ यूएसडीटी समेत फेला परेको प्रहरीको भनाइ छ।
