१५ अर्बभन्दा बढीको आईपीओ निष्कासनको तयारी : सेबोनमा ८९ कम्पनी पाइपलाइनमा 

काठमाडौं। सार्वजनिक शेयर निष्काशन (आईपीओ)को तयारीमा रहेका कम्पनीहरूको संख्या उल्लेख्य रूपमा बढ्दै गएको छ। नेपाल धितोपत्र बोर्ड (सेबोन)का अनुसार हाल ८९ कम्पनी आईपीओ पाइपलाइनमा रहेका छन्।

सेबोनका तथ्यांकअनुसार क्षेत्रगत रूपमा हेर्दा हाइड्रोपावर क्षेत्र अग्रस्थानमा रहेको छ। कुल ८९ कम्पनीमध्ये ३१ हाइड्रोपावर, १४ होटल तथा पर्यटन, ४ इन्भेस्टमेन्ट, २४ माइक्रोफाइनान्स तथा प्रोसेसिङ, ३ माइक्रो इन्स्योरेन्स र १३ अन्य क्षेत्रका कम्पनीहरू आईपीओ निष्काशन प्रक्रियामा छन्।

हाइड्रोपावर क्षेत्रका ३१ कम्पनीले मात्रै करिब १५ अर्ब १४ करोड ६३ लाख रुपैयाँ बराबरको आईपीओ प्रस्ताव गरेका छन्। ती कम्पनीहरूले कुल १४ करोड ७३ लाख ९१ हजार कित्ता शेयर निष्काशनका लागि आवेदन दिँदै हाल बोर्डको स्वीकृतिको प्रतीक्षामा रहेका छन्।

यीमध्ये केही कम्पनीहरूले ठूलो परिमाणमा आईपीओ ल्याउने तयारी गरेका छन्। सिउरी न्यादी पावर लिमिटेडले सबैभन्दा ठूलो परिमाणमा ३ करोड ३ लाख ६० हजार ७८४ कित्ता शेयर (करिब ३ अर्ब ३ करोड ६० लाख रुपैयाँ बराबर) निष्काशनको प्रस्ताव गरेको छ। त्यसैगरी, युनाइटेड मेवा खोला हाइड्रोपावरले १ करोड २३ लाख कित्ता (१ अर्ब २३ करोड रुपैयाँ) र मेवा डेभलर्पस लिमिटेडले १ करोड १२ लाख कित्ता (१ अर्ब १२ करोड रुपैयाँ) आईपीओ निष्काशनका लागि अनुमति मागेका छन्।

त्यस्तै, भिजन इनर्जी एण्ड पावरले ८३ लाख कित्ता र इलेक्ट्रो पावर कम्पनीले ८१ लाख २५ हजार कित्ता शेयर निष्काशनको प्रस्ताव गरेका छन्। यी कम्पनीहरू पनि ठूलो आकारका आईपीओ ल्याउने समूहमा पर्छन्।

पाइपलाइनमा रहेका अन्य उल्लेखनीय हाइड्रोपावर कम्पनीहरूमा माउन्ट एभरेष्ट पावर डेभलपमेन्ट, आशुतोष इनर्जी, हिटलन हाइड्रो इनर्जी, पुवा खोला वान हाइड्रोपावर, मादमे खोला हाइड्रोपावर, निलगरी खोला हाइड्रोपावर, पिपुल्स इनर्जी लिमिटेड, चम्पावती हाइड्रोपावर, हिम पर्वत हाइड्रोपावर, सेन्चुरी इनर्जी लिमिटेड, हेयाविट्याक पावर र नुम्बुर हिमालयन हाइड्रोपावर लगायतका छन्।

यसका साथै युनाइटेड मेवा खोला हाइड्रोपावर, आरती पावर कम्पनी, म्यादी हाइड्रोपावर, एलसी इनर्जी लिमिटेड, झ्यामोलोङ्गमा हाइड्रोपावर, अर्विट इनर्जी, ह्वाइट लोटस पावर लगायतका कम्पनीहरू पनि पूँजी बजारमा प्रवेशको अन्तिम तयारीमा छन्।

उपलब्ध विवरणअनुसार सिउरी न्यादी पावरले सबैभन्दा बढी शेयर निष्काशन गर्ने योजना बनाएको छ भने युनाइटेड मेवा खोला हाइड्रोपावर र मेवा डेभलर्पस लिमिटेड पनि ठूला आईपीओ ल्याउने सूचीमा छन्। अधिकांश कम्पनीहरूले प्रतिकित्ता १०० रुपैयाँ अंकित मूल्य कायम गरेका छन्, यद्यपि सेन्चुरी इनर्जी लिमिटेड र नुम्बुर हिमालयन हाइड्रोपावरको मूल्य संरचनामा केही भिन्नता देखिन्छ।