काठमाडौँ। विद्यार्थी संगठन खारेज गर्ने सरकारका पछिल्ला कदमविरुद्ध कानूनका विद्यार्थीहरु सडकमा उत्रिएका छन्। विश्वविद्यालयमा विद्यार्थी संगठनहरूको अस्तित्व समाप्त पार्ने सरकारी नियतका विरुद्ध नेपाल ल क्याम्पसमा अध्ययनरत कानूनका विद्यार्थी सडकमा उत्रिएका हुन् ।
बिहीबार नेपाल ल क्याम्पस स्ववियु तथा संयुक्त विद्यार्थी संगठनको आयोजनामा विद्यार्थीले सरकारको अधिनायकवादी कदमविरुद्ध प्लेकार्डसहित शान्तिपूर्ण मार्चपास गरेका हुन्।
विद्यार्थीले विश्वविद्यालयको स्वायत्ततामा हस्तक्षेप गर्न खोजेको र विद्यार्थी संगठनहरूको आवाजलाई दबाउन सरकारले अधिनायकवादी बाटो लिएको आरोप लगाएका छन् ।
मार्चपासमा सहभागीहरूले ‘शिक्षामा दलीय हस्तक्षेप बन्द गर’, ‘स्ववियुको अधिकार रक्षा गर’ र ‘अधिनायकवादी कदम खारेज गर’ जस्ता नारा लेखिएका प्लेकार्डहरू बोकेर क्याम्पस परिसर अगाडि प्रदर्शन गरेका थिए ।
