काठमाडौं । भुजुङ हाइड्रोपावर लिमिटेडको साधारण सेयर (आईपीओ) माघ १२ गतेदेखि सर्वसाधारणका लागि खुल्ने भएको छ। यसअघि आयोजना प्रभावित स्थानीय बासिन्दा तथा वैदेशिक रोजगारीमा रहेका नेपालीहरूका लागि आईपीओ बाँडफाँड सम्पन्न भइसकेको कम्पनीले जनाएको छ।
कम्पनीले सर्वसाधारण समूहका लागि ८ लाख ३० हजार कित्ता साधारण सेयर निष्कासन गर्न लागेको हो। प्रति सेयर अंकित मूल्य १०० रुपैयाँ रहेको यस आईपीओमा लगानीकर्ताले न्यूनतम १० कित्तादेखि अधिकतम धितोपत्र बोर्डले तोकेको सीमाभित्र रही आवेदन दिन सक्नेछन्।
नेपाल धितोपत्र बोर्ड (सेबोन)ले भुजुङ हाइड्रोपावरलाई जारी पुँजी १ अर्ब रुपैयाँको २० प्रतिशत, अर्थात् २० करोड रुपैयाँबराबरको साधारण सेयर निष्कासन गर्न अनुमति दिएको थियो। सो अनुमतिअनुसार, जारी पुँजीको १० प्रतिशत (१० करोड रुपैयाँ) आयोजना प्रभावित स्थानीय बासिन्दाका लागि र बाँकी १० प्रतिशत (१० करोड रुपैयाँ) सर्वसाधारण लगानीकर्ताका लागि छुट्याइएको हो।
