काठमाडौँ। कास्कीका एक प्रहरी वरिष्ठ हवलदारलाई अख्तियार दुरुपयोग अनुसन्धान आयोगले ५० हजार रुपैयाँ घुससहित नियन्त्रणमा लिएको छ।
लागूऔषध जस्तो संवेदनशील मुद्दामा सहजीकरण गरिदिने प्रलोभन देखाई सेवाग्राहीसँग घुस मागेको आरोप लागेका कास्की जिल्ला प्रहरी कार्यालयको मुद्दा फाँटमा कार्यरत प्रहरी वरिष्ठ हवलदार विष्णु थापा क्षेत्रीलाई अख्तियारको टोलीले ५० हजार रुपैयाँ घुससहित शनिबार नियन्त्रणमा लिएको हो ।
लागूऔषध मुद्दामा अनुसन्धान प्रक्रियालाई प्रभावित पारी ‘सेटिङ’ मिलाइदिने भन्दै क्षेत्रीले सेवाग्राहीसँग घुस मागेका थिए । सोही सूचनाका आधारमा अख्तियार दुरुपयोग अनुसन्धान आयोगको कार्यालय, पोखराबाट खटिएको विशेष टोलीले उनलाई घुस लिइसकेको अवस्थामा रङ्गेहात पक्राउ गरेको हो ।
आयोगका अनुसार पक्राउ परेका क्षेत्रीमाथि थप अनुसन्धान भइरहेको छ ।
