काठमाडौं। सार्वजनिक खरिद अनुगमन कार्यालयको ‘इ–बिडिङ’ प्रणालीमा अनधिकृत प्रवेश गरी ठेक्काका गोप्य विवरणहरू हेरफेर गरेको आरोपमा प्रहरीले थप दुई जनालाई नियन्त्रणमा लिएको छ । सार्वजनिक खरिदसम्बन्धी ईजीपी प्रणालीमा अनधिकृत पहुँच पुर्याइ ठेक्का विवरण हेरफेर गरेको आरोपमा दुई जनालाई पक्राउ गरेको केन्द्रीय अनुसन्धान ब्यूरो (सीआईबी) ले जानकारी दिएको छ ।
नेपाल प्रहरीको साइबर ब्यूरो भोटाहिटीबाट खटिएको विशेष टोलीले काठमाडौँका विभिन्न स्थानबाट उनीहरूलाई पक्राउ गरेको हो। पक्राउ पर्नेहरूमा ईन्कोन प्रालिका सेयरधनी एवं लेखापाल ३० वर्षीय स्वदेश पोखरेल र कल्पवृक्ष बिल्डर्स प्रालिका सञ्चालक ४१ वर्षीय प्रकाश ढुंगाना रहेका छन् ।
प्रहरीका अनुसार पोखरेललाई वैशाख १२ गते पेप्सिकोलाबाट र ढुंगानालाई वैशाख १३ गते बालाजु क्षेत्रबाट नियन्त्रणमा लिइएको हो । अभियुक्तहरूले विभिन्न विकास निर्माणका ठेक्काहरूको आर्थिक प्रस्ताव खुल्नुभन्दा अगावै प्रणाली ह्याक गरी आफ्नो अनुकूल हुने गरी कागजातहरू परिवर्तन गर्ने गरेको पाइएको छ । ठेक्का प्रक्रियामा अस्वस्थ प्रतिस्पर्धा गराई सरकारी प्रणालीको गोपनीयता भङ्ग गरेको उजुरी परेपछि ब्यूरोले सुक्ष्म अनुसन्धान अघि बढाएको थियो ।
यसअघि विद्युतीय कारोबार ऐन, २०६३ अन्तर्गत मात्रै अनुसन्धान सुरु गरिएको भए पनि घटनाको गम्भीरता र गिरोहको संलग्नता देखिएपछि अहिले उनीहरूमाथि संगठित अपराध निवारण ऐन, २०७० बमोजिम मुद्दा चलाइएको छ ।
अदालतबाट पक्राउ अनुमति लिई नियन्त्रणमा लिइएका दुवै जनामाथि थप प्रमाण सङ्कलन र गिरोहका अन्य सदस्यहरूको खोजी कार्य भइरहेको ब्यूरोले जनाएको छ। सरकारी विद्युतीय प्रणालीको सुरक्षामाथि भएको यो आक्रमणलाई सुरक्षा निकायले गम्भीर वित्तीय अपराधका रूपमा लिएको छ।
