काठमाडौँ । नक्कली भुटानी शरणार्थी प्रकरणमा पुर्पक्षका लागि कारावास काटिरहेका पूर्व गृहमन्त्री बालकृष्ण खाँणको निवेदनमाथि यही मङ्सिर २८ गते सुनुवाइ हुने भएको छ ।
उच्च अदालत पाटनले खाँणको निवेदनमाथि तेस्रो न्यायाधीशको बेन्चमा २८ गतेका लागि पेशी तोकेको हो । बालकृष्ण खाँणसँग धरौटी माग गर्ने कि थुनामै पठाउने भन्ने सम्बन्धमा दुई न्यायाधीशको राय बाझिएपछि निर्णयका लागि तेस्रो न्यायाधीशको इजलासमा पठाउने आदेश प्राप्त भएको छ ।
मङ्सिर १५ गते शुक्रवार भएको आदेशमा उच्च अदालत पाटनले ९ जना प्रतिवादीका हकमा थुनामा पठाउने काठमाडौँ जिल्ला अदालतको आदेशलाई सदर गरेको थियो ।
खाणलाई धरौटीमा रिहा गर्ने सन्दर्भमा न्याय सेवाबाट उच्च अदालतको न्यायाधीश भएका प्रकाश खरेलले फरक मत राखेपछि निर्णय मुल्तबीमा बसेको थियो । ६ जना प्रतिवादीको हकमा थुनामै राख्ने काठमाडौँ जिल्ला अदालतको आदेश बदर गरी धरौटी माग गर्ने आदेश दिएको थियो ।
