काठमाडौँ । चालु आर्थिक वर्षको वैशाखसम्म गाडी कर्जा शीर्षकमा बैंकहरुबाट सवा १ खर्ब रुपैयाँ भन्दा बढी प्रवाह भएको छ।
मंगलवार साँझ नेपाल राष्ट्र बैंकले सार्वजनिक गरेको तथ्यांक अनुसार चालु आर्थिक वर्षको १० महिनामा बैंकहरुबाट १ खर्ब २९ अर्ब १७ करोड रुपैयाँ गाडी कर्जा प्रवाह भएको उल्लेख छ । अघिल्लो आर्थिक वर्षको असार मसान्तसम्मको तुलनामा गाडी कर्जा ४.१ प्रतिशतले बढेको छ।
अघिल्लो वर्ष असार मसान्तसम्म १ खर्ब २४ अर्ब १० करोड रुपैयाँ गाडी कर्जा प्रवाह भएको थियो। समीक्षा अवधिसम्म बैंकहरुबाट व्यावसायिक प्रयोजनका लागि ८६ अर्ब ८३ करोड रुपैयाँ गाडी कर्जा गएको छ।
गत असारसम्म व्यावसायिक प्रयोजनका लागि बैंकहरुबाट ८७ अर्ब २६ करोड रुपैयाँ गाडी कर्जा गएको थियो। असारको तुलनामा समीक्षा अवधिमा यो शीर्षकमा गएको कर्जा ०।५ प्रतिशतले घटेको छ।
चालु आर्थिक वर्षको वैशाखसम्म बैंकबाट व्यक्तिगत प्रयोजनका लागि ४२ अर्ब ३३ करोड रुपैयाँ गाडी कर्जा गएको छ। जुन गत असारसम्मको तुलनामा १४.९ प्रतिशतले बढी हो।
