काठमाडौं । अपर तामाकोशी हाइड्रोपावर लिमिटेडले शेयर अभौतिकीकरण गराउन आग्रह गरेको छ । कम्पनीले कर्मचारी र आयोजना प्रभावित स्थानीयलाई शेयर अभौतिकीकरण गराउन आग्रह गरेको हाे ।
कम्पनीले कर्मचारी सञ्चयकोषमा रकम जम्मा गर्ने सञ्चयकर्ता लगाएत कम्पनीमा ऋण लिने र दिने संस्थाका कर्मचारीका लागि आईपीओ जारी गरेको थियो ।
आयोजना प्रभावित स्थानीयमा समेत कम्पनीले आईपीओ जारी गरेको थियो । सो समयमा आईपीओ प्राप्त गर्ने सदस्यहरूलाई भौतिक रुपमै प्रमाणपत्र वितरण गरिएकाले सो प्रमाणपत्र संकलन गर्न बाँकी शेयरधनीहरूलाई आफ्नो प्रमाणपत्र संकलन गरी अभौतिभीकरण गर्न कम्पनीले भनेको हो ।
यस कम्पनीले शतप्रतिशत हकप्रद शेयर विक्री गर्न अनुमति पाईसकेको छ । असार २२ गते हाल कायम चुक्तापूँँजी १० अर्ब ५९ करोड रूपैयाँको आधारमा १० करोड ५९ लाख कित्ता हकप्रद शेयर विक्री गर्न कम्पनीले बोर्डबाट अनुमति पाएको हो ।
यो शेयरमा आवेदन दिनका लागि समेत सहज हुने जानकारी दिदैं हालसम्म पनि आफ्नो शेयर अभौतिकीकरण नगराएका सदस्यहरूलाई यथासिघ्र गराउन कम्पनीले आग्रह गरेको हो । सम्बन्धित शेयरधनीहरूले कम्पनीको शेयर रजिष्ट्रार सनराइज क्यापिटल लिमिटेडमा सम्पर्क राख्नुपर्नेछ ।
