काठमाडौं । देशका मुख्य सडक अवरुद्ध भएपछि यातायात मन्त्रालयमा आकस्मिक बैठक बसेको छ।
शुक्रबार रातिदेखि नारायणगढ–मुग्लिन सडकखण्ड अवरुद्ध भएको हो। तुइनखोलामा लगातार पहिरो खस्दा सडक खुलाउन कठिनाइ भएको छ। यात्रुहरू रातिदेखि नै अलपत्र परेका छन्।
यातायात मन्त्री कुलमान घिसिङले सडक विभाग, गृह मन्त्रालय, यातायात व्यवसायी महासंघ र मजदुरहरूसँग बैठकमा छलफल गरेका छन्। सरोकारवालाले सडकको अवस्थाबारे बैठकमा जानकारी दिएका छन्।
ट्राफिक प्रहरीले डोजर खटाए पनि लगातार पहिरो खस्दा काम गर्न नसकिएको जनाएको छ। यससँगै कोशी राजमार्ग र अरनिको राजमार्गका विभिन्न स्थानमा पनि पहिरो खस्दा सडक अवरुद्ध भएका छन्। यी सबै ठाउँमा सडक खोल्ने प्रयास भइरहेको प्रहरीले जनाएको छ।
