काठमाडौँ । पृथ्वी राजमार्गको मलेखु–मुग्लिन सडकखण्डमा सोमबार राति सुख्खा पहिरो खस्दा दुईतर्फी यातायात बन्द भएको छ। धादिङको बेनीघाट रोराङ गाउँपालिका–१०, बाँदरेमोडमा पहिरो खसेपछि आवागमन रोकिएको जिल्ला प्रहरी कार्यालय धादिङले जनाएको छ।
हाल पहिरो पन्छाउने काम सुरु भए पनि दिनभर लाग्न सक्ने प्रहरीले अनुमान गरेको छ। साथै यात्रुहरूलाई पायक पर्ने वैकल्पिक मार्ग प्रयोग गर्न आग्रह गरिएको छ।
यसअघि मुग्लिन–नारायणगढ सडकखण्डको तुइनखोलामा शुक्रबार खसेको पहिरोका कारण झन्डै तीन दिन यातायात अवरुद्ध भएको थियो।
