काठमाडौं। हिमालयन एभरेष्ट इन्स्योरेन्स लिमिटेडले आफ्नो ३२ औँ वार्षिक साधारण सभा सम्पन्न गरेको छ। काठमाडौँस्थित अनमोल ब्याङ्क्वेट, शंखमूलमा सम्पन्न उक्त सभामा आर्थिक वर्ष २०८१/८२ को वार्षिक प्रतिवेदन, वित्तीय विवरण तथा अन्य महत्वपूर्ण प्रस्तावहरू प्रस्तुत गरि सर्वसम्मतिले पारित भएका छन्।
सभामा कम्पनीका अध्यक्ष महेन्द्र कृष्ण श्रेष्ठले आर्थिक वर्ष २०८१/८२ को वार्षिक प्रतिवेदन प्रस्तुत गरेका थिए।
यस्तै, साधारण सभाले सञ्चालक समितिले प्रस्ताव गरेको चुक्ता पुँजीको ८ प्रतिशत नगद लाभांश कर सहित पारित गरेको छ। संचालक समितिको सिफारिस बमोजिम कम्पनीको चुक्ता पुँजी २ अर्ब ५० करोड १ लाख ५७ हजार ४ सयको ८ प्रतिशतका दरले हुन आउने २० करोड १२ हजार ५ सय ९२ रुपैँया लाभांश वितरण गर्ने प्रस्ताव पारित गरेको हो।
साथै सभाले लेखापरीक्षण समितिको सिफारिस बमोजिम लेखापरीक्षक नियुक्ति गर्ने र निजको पारिश्रमिक तोक्ने प्रस्ताव पनि पारित गरेको छ। साधारण सभामा शेयरधनीहरूको उत्साहजनक सहभागिता रहेको थियो। कम्पनीले चालु आर्थिक वर्षमा समेत दिगो वृद्धि र सेयरधनीको हितमा काम गर्ने प्रतिबद्धता व्यक्त गरेको छ।
