काठमाडौं । अन्तर्राष्ट्रिय राइड-हेलिङ प्लेटफर्म इन्ड्राइभले काठमाडौंमा आफ्नो आधिकारिक कार्यालयको उद्घाटन गरेको छ। कम्पनीले गत शुक्रबार उक्त कार्यालयको उद्घाटन गरेको हो । कार्यालयको उद्घाटनले चालकहरूसँगको समन्वय, सेवा गुणस्तर सुधार र स्थानीय कार्यक्रमहरू सञ्चालनमा सहायता गर्ने उद्देश्य राखेको इन्ड्राइभले जनाएको छ।
इन्ड्राइभका एशिया–प्रशान्त क्षेत्रीय निर्देशक मार्क टोलीले चालकहरूका लागि सेवा पहुँच सहज बनाउने उद्देश्यले कार्यालय स्थापना गरिएको बताए । “यो कार्यालयले एउटा सपोर्ट सेन्टरको रूपमा काम गर्नेछ । यहाँ चालकहरूले आवश्यक जानकारी, प्रशिक्षण र सहयोग पाउनेछन्,” टोलीले बताए।
इन्ड्राइभ नेपालकी निर्देशक रीता पोखरेलले नेपाल कम्पनीको प्राथमिक बजारमध्ये एक रहेको जनाउँदै स्थानीय चालक समुदायसँगको सम्बन्धलाई अझ सशक्त बनाउने उद्देश्यले कार्यालय स्थापना गरिएको बताइन् ।
इन्ड्राइभ सन् २०१२ मा सुरु भएको कम्पनी हो । यसले विभिन्न देशहरूमा ‘पियर टु पियर प्राइसिङ’ मोडलमार्फत सेवा प्रदान गर्दै आएको छ।
