काठमाडौँ । ओम मेगाश्री फर्मास्युटिकल्स लिमिटेड चालु आर्थिक वर्षको दोस्रो त्रैमाससम्म आइपुग्दा झण्डै ४ करोड रुपैयाँ नोक्सानीमा पुगेको छ। कम्पनीले सार्वजनिक गरेको अपरिष्कृत वित्तीय विवरणअनुसार चालु आवको पहिलो ६ महिनामा कम्पनीले ३ करोड ८४ लाख रुपैयाँ खुद नोक्सानी व्यहोरेको हो।
समीक्षा अवधिसम्म कम्पनीले १० करोड ४८ लाख रुपैयाँ सञ्चालन आम्दानी गरेको छ। कुल आम्दानी भने १० करोड ५१ लाख रुपैयाँ पुगेको देखिन्छ। तर सोही अवधिमा कम्पनीको कुल खर्च १४ करोड ३५ लाख रुपैयाँ पुगेपछि आम्दानीले खर्च धान्न नसक्दा कम्पनी नोक्सानीमा गएको हो। खर्च संरचना उच्च रहनु तथा आम्दानी अपेक्षाअनुसार बढ्न नसक्नु नोक्सानीको मुख्य कारणका रूपमा देखिएको छ।
६० करोड रुपैयाँ चुक्ता पुँजी रहेको कम्पनीको रिटेन्ड अर्निङ्ग ७ करोड ४८ लाख रुपैयाँ ऋणात्मक अवस्थामा पुगेको छ, जसले विगतको संचित नोक्सानी अझै पूर्ण रूपमा सम्हालिन नसकेको संकेत गर्छ। यद्यपि कम्पनीसँग ६ करोड २३ लाख रुपैयाँ अन्य जगेडा भने कायम रहेको छ।
दोस्रो त्रैमाससम्म कम्पनीको प्रतिसेयर आम्दानी (EPS) १२ रुपैयाँ ८१ पैसा ऋणात्मक रहेको छ, जसले सेयरधनीको लगानी प्रतिफलमा दबाब परेको देखाउँछ। त्यस्तै, प्रतिसेयर नेटवर्थ ९७ रुपैयाँ ९३ पैसा कायम रहेको छ।
