काठमाडौं । नर्सरी व्यवसायी संघले फूल तथा बत्तीको पर्व तिहारलाई मध्यनजर गर्दै ‘तिहार फ्लोरा एक्स्पो २०८०’ को आयोजना गरेको छ । हिजोदेखी शुरु भएको मेला १८ कात्तिकसम्म काठमाडौंको भृकुटीमण्डपमा आयोजना गरिएको हो ।
मेलामा विभिन्न प्रजातिका फूल फुल्ने तथा नफुल्ने आलंकारिक फूल बिरुवाहरूलगायत कृषि तथा वन, जडीबुटी नर्सरी, फलफूल नर्सरीबाट उत्पादित विविध प्रजातिका बोटबिरुवाहरू प्रदर्शनी तथा बिक्री–वितरणका लागि राखिएको छ । मेलामा ६० वटा व्यावसायिक स्टल तथा मलखाद, अर्गानिक एवं रासायनिक विषादी, बिउबिजन, औजार उपकरण तथा प्रविधिहरूको समेत स्टल रहेको छ । नर्सरी व्यवसाय गर्न चाहने नवउद्यमी, जिज्ञासु एवं अध्ययन–अध्यापन साथै अनुसन्धान गर्ने सम्पूर्णका लागि मेलाले अवसर उपलब्ध गराउने संघले जनाएको छ ।
मेला अवलोकन गर्न सर्वसाधारणका लागि प्रवेश शुल्क प्रतिव्यक्ति एक सय रुपैयाँ तथा विद्यार्थीका लागि प्रतिव्यक्ति ५० रुपैयाँ तोकिएको छ ।
