काठमाडौं । उपप्रधान एवं गृहमन्त्री रवि लामिछानेविरुद्ध स्वर्णलक्ष्मी सहकारी ठगी आरोपमा जाहेरी दर्ता भएको छ।

यस अगाडि नै सहकारी ठगीको आरोप लागेका गृहमन्त्री लामिछानेविरुद्ध टेकु प्रहरी परिसरमा सिन्धुलीका युवराज पौडेल ‘सफल’ले जाहेरी दर्ता गराएका हुन् ।

हुलाकमार्फत दर्ता गराईएको उक्त जाहेरीमा सहकारी ठगी अरोपमा फरार रहेका गितेन्द्रबाबु राईलाई पनि प्रतिवादी बनाइएको छ। काठमाडौंस्थित स्वर्णलक्ष्मी सहकारीबाट गोर्खा मिडिया नेटवर्कको नाममा ६४ करोड रुपैयाँ गैरकानुनी रुपमा कर्जा लिई अपचलन गरेको जाहेरीमा उल्लेख छ ।

जाहेरीमा लामिछाने २०७७ फागुन ११ देखि २०७९ असार १ गतेसम्म गोर्खा मिडिया नेटवर्कको संचालक तथा प्रबन्ध निर्देशकको जिम्मेवारीमा हुदा स्वर्णलक्ष्मी सहकारीबाट गोर्खा मिडियाको नाममा ६४ करोड गैर कानुनी रुपमा कर्जा लिने कार्यमा संलग्न रहेको उल्लेख गरिएको छ ।

पौडेलले यस अगाडि समेत गृहमन्त्री लामिछानेले पुरानै नागरिकताको प्रतिलिपि मात्रै लिएको दाबी गर्दै मुद्दा दर्ता गराएका थिए ।