काठमाडौँ । माओवादी केन्द्र निकट योङ कम्युनिष्ट लिग (वाईसीएल) नेपालले निरन्तर वर्षाका कारण देशका विभिन्न भागमा जोखिम बढ्दै गएको सन्दर्भमा देशव्यापी उद्धार तथा राहत अभियान सञ्चालन गर्ने घोषणा गरेको छ ।
पछिल्ला दिनहरूमा प्राकृतिक विपद्का कारण ठुलो मानवीय र भौतिक क्षति हुने सम्भावना बढिरहेको भन्दै वाईसीएलस नेपालले आफ्ना संरचना तथा सदस्यहरूलाई जनसेवामा लाग्न निर्देशन दिएको छ ।
वाईसीएल नेपालका अध्यक्ष पुष्प ओलीले शनिबार जारी गरेको विज्ञप्तिमा देशभरका १० हजारभन्दा बढी सदस्यहरूलाई तत्काल उद्धार, राहत र सहयोगका कार्यमा खटिन आह्वान गरिएको छ । उनका अनुसार संगठनका सम्पूर्ण तह–तप्काका साथीहरूलाई स्थानीय तह, सामाजिक संघ–संस्था, युवा क्लब तथा विपद् व्यवस्थापनसँग सहकार्य गरेर प्रभावित क्षेत्रमा सक्रिय हुन निर्देशन दिइएको छ ।
संगठनले बाढी र डुबानबाट विस्थापित परिवारलाई आवश्यक खाद्यान्न, लत्ताकपडा, ओछ्यान, औषधि तथा प्राथमिक उपचार सामग्री आपूर्ति गर्ने तयारी गरेको छ भने पहिरोका कारण अवरुद्ध भएका सडक मार्ग खुलाउन र उद्धार कार्यमा समेत प्रत्यक्ष संलग्न हुने बताएको छ ।
