काठमाडौँ । सुन्सरिस्थित रिलायन्स स्पिनिङ मिल्सले लोडसेडिङको समयमा डेडिकेटेड तथा ट्रंक लाइनमार्फत उपभोग गरिएको विद्युत्को प्रिमियम महसुल बक्यौता रकमको पहिलो किस्ता नेपाल विद्युत् प्राधिकरणलाई बुझाएको छ।
प्राधिकरणका कार्यकारी निर्देशक मनोज सिलवालका अनुसार, पहिलो किस्ता बुझाएपछि रिलायन्स मिल्सको विच्छेद गरिएको विद्युत् लाइन पुनः जडान गरिएको हो।
रिलायन्सले २०७२ माघदेखि २०७५ वैशाखसम्म डेडिकेटेड तथा ट्रंक लाइन प्रयोगबापत तिर्नुपर्ने प्रिमियम महसुलको पहिलो किस्ता बुझाएको हो। उक्त अवधिसम्म रिलायन्सको कुल बक्यौता रकम ७५ करोड ३७ लाख रुपैयाँ रहेको प्राधिकरणले जनाएको छ।
सम्झौता अनुसार, रिलायन्सले उक्त बक्यौतालाई २८ किस्तामा तिर्ने व्यवस्था गरेको छ। त्यसअन्तर्गत पहिलो किस्ताका रूपमा २ करोड ७७ लाख रुपैयाँ बुझाइएको हो।
