सन् १९५० को दशकका केही वर्ष आफ्नै बाबुको बफिट–फाल्क कम्पनीमा लगानी बिक्रेताको काम गरेका उनले सन् १९५४ मा उनै बेन्जामिन ग्राहमको ग्राहम–न्युम्यान कम्पनीमा सुरक्षा विश्लेषकको कामसमेत गरेका थिए । आफ्नो लगानीयात्राका शुरुवाती चरणमा बफिटले सरकारी कर्मचारीको बीमा संस्था (गेइको) र रकउडजस्ता कम्पनीको शेयर खरिद गरेका थिए । शेयरमा लगानी सफल हुँदै जाँदा उनले सन् १९५६ मा बफिट एसोशिएट्स नामक लगानी व्यवस्थापन कम्पनी स्थापना गरेका थिए ।
अङ्ग्रेजी पत्रिका बायोग्राफी डट कमका अनुसार बफेटले ११ वर्षको उमेरमा नै प्रति शेयर ४३८ मा सिटी सर्भिस प्रिफर्डको तीन सेयर खरिद गरेर आफ्नो पहिलो लगानी गरेका थिए । बजारमा घटबढ देखिएपछि उनले थोरै मुनाफामा आफ्नो शेयर बेचेका थिए । तर जब सिटी सर्भिसको शेयर प्रति शेयर २०० डलर पुग्यो, उनले आफ्नो निर्णयलाई पछुताएका थिए । उनले पछि यो अनुभवलाई लगानीमा धैर्यताको प्रारम्भिक पाठको रूपमा वर्णन गर्ने गरेका छन् । त्यसपछि भने उनले जीवनमा धेरै सफलता प्राप्त गरेका छन् । जसका कारण उनलाई पछाडि फर्केर हेर्नुपर्ने आवश्यकता छैन । उनी अहिले फोब्सको टप १० करोडपतिको सुचीमा सूचीकृत छन् ।
बफेटले गरेका छन् यी कम्पनीमा लगानी ?
बफेटले मिडिया, बीमा, ऊर्जा, र खाद्य र पेय उद्योगहरूमा ठुलो लगानी गरेका छन् । सन् १९५६ मा, बफेटले आफ्नो गृह नगर ओमाहामा बफेट पार्टनरसिप लिमिटेड नामक फर्म स्थापना गरेका थिए । यस्तै आफूले सिकेका प्रविधिहरू प्रयोग गरेर कम मूल्यवान कम्पनीहरू पहिचान गरी लगानी गर्दै उनी एक सफल तथा करोडपति व्यक्ति बन्न सफल भए । बफेटले ‘बर्क शायर ह्याथवे’ नामक एक कपडा कम्पनीमा लगानी गरे । पछि उनले उक्त कम्पनीलाई खरिद गरेका थिए । यसका अतिरिक्त उनले मिडिया (द वासिङ्टन पोस्ट), बीमा(जीईआईसीओ) र तेल (एक्सोन) जस्ता कम्पनीमा समेत लगानी गरेका छन् ।
यस्तो छ उनको जीवनशैली
बफेटओमाहा, नेब्रास्कामा आफ्नो परिवारसँग बस्ने गर्छन् । उनी विलासी कार पनि चढ्दैनन् । म्याकडोनाल्ड्समा नास्ता खान्छन् भने बफेटले कोक धेरै पिउने गर्छन् । सीएनएन संग गरेको एक कुराकानीमा उनले धेरै घर किन्ने, धेरै कार चढ्ने रहर आफूलाई कहिल्यै नलागेको बताएका थिए । उनी पहिले लिंकन टावर कार २००१ चढ्थे । त्यो कार उनले लिलाम गरिदिए । त्यसपछि काडिलाक डीटीएस २००६ चढ्न थाले । पछि सन् २०१४ मा उनले काडिलाक एक्सटीएस किने । उनले लामो समय २० डलरमा किनेको सामसुङको फ्लिपफ्लप फोन चलाउँथे । पछि मात्र उनले आईफोन बोक्न थालेका थिए ।
