नेपालगन्ज। सरकारले देशभर सरकारी तथा सार्वजनिक जग्गामा भएको अतिक्रमण हटाउने अभियान तीव्र पारेसँगै बाँकेको नरैनापुर गाउँपालिकाले पनि अतिक्रमणविरुद्ध कडा कदम अघि बढाएको छ ।
गाउँपालिका अध्यक्ष इश्तियाक अहमद शाहद्वारा हस्ताक्षरित सूचनामार्फत अतिक्रमण गरी बसोबास वा संरचना निर्माण गरेका व्यक्तिहरूलाई सात दिनभित्र स्वेच्छाले जग्गा खाली गर्न निर्देशन दिइएको छ ।
तोकिएको समयभित्र जग्गा खाली नगरे वा अवैध संरचना नहटाएमा गाउँपालिकाले डोजर प्रयोग गरी हटाउने चेतावनी समेत सूचनामा दिइएको छ ।
गाउँपालिकाले जिल्ला प्रशासन कार्यालय, जिल्ला प्रहरी कार्यालय र सशस्त्र प्रहरी बलसँग समन्वय गर्दै अतिक्रमित सार्वजनिक तथा सरकारी जग्गा खाली गराउने प्रक्रिया सुरु गरेको गाउँपालिका अध्यक्ष शाहले बताउनुभयो ।
उहाँका अनुसार सार्वजनिक जग्गा संरक्षणसम्बन्धी परिपत्र कार्यान्वयन गर्दै अतिक्रमण हटाउने सूचना जारी गरिएको हो । “सरकारको एक सय कार्यसूची” अन्तर्गत अतिक्रमण नियन्त्रण, संरक्षण र नयाँ अतिक्रमण रोक्ने नीति अनुसार अभियान अघि बढाइएको उहाँले बताउनुभयो ।
स्थानीयका अनुसार करिब दुई दशकअघि पनि गाउँपालिकामा अतिक्रमण हटाउने प्रयास भएको थियो । तर पछि विभिन्न शक्ति केन्द्रको संरक्षणमा पुनः अतिक्रमण बढ्दै गएको जनाइएको छ ।
नेकपा एमाले नरैनापुरका सचिव विनय दीक्षितले सार्वजनिक सम्पत्ति संरक्षणका लागि सबै पक्षको सहकार्य आवश्यक रहेको बताउनुभयो । अतिक्रमित क्षेत्रको यथार्थ विवरण तयार गरी प्रभावकारी कार्यान्वयन गर्नुपर्ने उहाँको धारणा छ ।
स्थानीय सरकारको अतिक्रमण हटाउने अभियानमा सबैले सहयोग गर्न आग्रह गर्दै गाउँपालिकाका प्रमुख प्रशासकीय अधिकृत नवराज वलीले यो अभियानले दीर्घकालीन रूपमा सुव्यवस्थित बसोबास तथा पूर्वाधार विकासमा टेवा पुग्ने विश्वास व्यक्त गर्नुभयो ।
