काठमाडौँ । काठमाडौँ महानगरपालिकाले भदौ २९ गते आइतबारदेखि विद्यालयका शिक्षक तथा कर्मचारीहरूलाई विद्यालयमा उपस्थित हुन निर्देशन दिएको छ। देशमा सिर्जित पछिल्लो राजनीतिक परिस्थितिका कारण प्रभावित भएको शैक्षिक गतिविधिलाई पुनः सुचारु गर्न महानगरपालिकाले यो निर्णय गरेको हो।
जिल्ला प्रशासन कार्यालय काठमाडौँले लगाएको कर्फ्यु र निषेधाज्ञा हटेको सूचना आएपछि महानगरपालिकाले उक्त निर्णय गरेको जानकारी दिएको छ ।
महानगरपालिकाद्वारा जारी सूचनामा भदौ २९ गते (आइतबार) देखि सबै शिक्षक तथा कर्मचारीहरू विद्यालयमा उपस्थित हुने, तर विद्यार्थीलाई भने नबोलाउन बोलाउन भनिएको छ।
यस दिन विद्यालयको प्रशासनिक र सरसफाइ सम्बन्धी कामहरू गर्न र विद्यालयमा कुनै प्रकारको क्षति पुगेको भए त्यसको विवरण महानगरपालिकालाई उपलब्ध गराउन भनिएको छ ।
त्यस्तै अभिभावकहरूसँग सम्पर्क गरी आफ्ना बालबालिकालाई विद्यालयमा पठाउन सुरक्षित महसुस गरे मात्र पठाउन अनुरोध गर्न भनिएको छ। भदौ ३० गते सोमबारदेखि अभिभावकको जिम्मामा विद्यालय आउने विद्यार्थीहरूलाई मनोसामाजिक परामर्शसहित नियमित पठनपाठन सुरु गराउन महानगरले निर्देशन दिएको छ ।
अभिभावकसँग आउन नसक्ने विद्यार्थीहरूलाई भर्चुअल कक्षा मार्फत पठनपाठनको व्यवस्था गर्न पनि भनिएको छ। महानगरपालिकाले जिल्ला प्रशासन कार्यालयको थप सूचना भएमा सोहीअनुसार निर्णय गरिने बताएको छ।
