काठमाडौं। लामो समयदेखि विद्युत् महसुल नबुझाएको भन्दै काटिएको घोराही सिमेन्ट उद्योगको लाइन पुनः जडान गरिएको छ। नेपाल विद्युत् प्राधिकरणका अनुसार, उद्योगले ट्रंक तथा डेडिकेटेड महसुलबापत पहिलो किस्ता स्वरूप १ करोड ८१ लाख रुपैयाँ भुक्तानी गरेपछि लाइन पुनः जडान गरिएको हो।
प्राधिकरणका प्रवक्ताका अनुसार, घोराही सिमेन्टमा कुल ५० करोड ८५ लाख रुपैयाँ महसुल बाँकी थियो। तोकिएको समयावधिभित्र रकम नबुझाएपछि प्राधिकरणले केही समयअघि उक्त उद्योगमा विद्युत् आपूर्ति बन्द गरेको थियो।
महसुलको पहिलो किस्ता बुझाएसँगै प्राधिकरण र उद्योगबीच किस्ताबन्दी भुक्तानीको सहमति भएको र बाँकी रकम तोकिएको तालिकाअनुसार भुक्तानी गर्ने प्रतिबद्धता उद्योगले जनाएको छ। नेपाल विद्युत् प्राधिकरणले पछिल्लो समय ट्रंक र डेडिकेटेड लाइनमार्फत बिजुली लिएका ठूला उद्योगहरूलाई तोकिएको महसुल समयमै तिर्न बारम्बार आग्रह गर्दै आएको छ।
समयमै भुक्तानी नगर्ने उद्योगहरूका लाइन काट्ने कार्य निरन्तर भइरहेको प्राधिकरणले जनाएको छ। यसअघि पनि प्राधिकरणले महसुल तिर्न ढिलाइ गर्ने विभिन्न ठूला उद्योगहरूको लाइन काटी कारबाही गरेको थियो। त्यस्तै, किस्ताबन्दीमा भुक्तानी गर्ने उद्योगहरूलाई समयमै किस्ता बुझाउने शर्तमा पुनः सेवा सञ्चालन गरिएको हो।
घोराही सिमेन्टले लाइन पुनः जडानसँगै उत्पादन गतिविधि सुरु गरेको र भविष्यमा तोकिएको तालिकाअनुसार बाँकी रकम बुझाउने तयारी गरेको जनाएको छ।
