काठमाडौं । रोजगार अनुमति प्रणाली ईपीएस अन्तर्गत उत्पादनमूलक क्षेत्रको दोस्रो चरणको सीप परीक्षणको नतिजा सार्वजनिक गरिएको छ । वैदेशिक रोजगार विभाग अन्तर्गत ईपीएस कार्यालयले गत वैशाख ९ गतेदेखि १५ गतेसम्म सञ्चालित दोस्रो चरणको सीप परीक्षण स्किल टेष्टको नतिजा सार्वजनिक गरिएको हो ।

दोस्रो चरणको लागि छनोट भएका छ हजार ३२१ जनामध्ये पाँच हजार ७५३ जना पास भएको ईपीएस कोरिया शाखाले जनाएको छ भने दोस्रो चरणका लागि छनोट भएका ४९८ जना फेल भएका छन् । त्यस्तै, ७० जना परीक्षामै सहभागी नभएको ईपीएस कार्यालयले जनाएको अवस्था छ ।

सीप परीक्षणमा उत्तिर्ण भएका व्यक्तिहरूको दक्षिण कोरियामा ईपीएस अन्तर्गत रोष्टर सूचीकृत प्रकृयाको लागि स्वास्थ्य परीक्षण र रोजगार आवेदन फाराम जब एप्लिकेशन फाराम दर्ता गरिने कार्यालयले जानकारी दिएको छ ।

उनीहरूको स्वास्थ्य परीक्षण २०८१।०१।३१ गतेदेखि जेठ २ गतेसम्म विभिन्न चार वटा अस्पतालमा हुने ईपीएस शाखाले जनाएको छ । त्यसका लागि पाटन अस्पताल, शुक्रराज ट्रपिकल अस्पताल, नेपाल कोरिया मैत्री अस्पाल र निजामती अस्पतालमा स्वास्थ्य परीक्षण हुनेछ ।

त्यस्तै २०८१।०२।५ गतेदेखि ८ गतेसम्म अनलाइनमार्फत रोजगार आवेदन फाराम दर्ता गरिने शाखाले जनाएको छ ।