काठमाडौं । अध्यक्ष बिहिन बनेको बीमाको नियमनकारी निकाय नेपाल बीमा प्राधिकरणमा अर्थमन्त्रालयले नयाँ कर्मचारीलाई अध्यक्षको रुपमा खटाउने तयारी गरेको छ ।
प्राधिकरण अध्यक्ष बिहिन बनेपछि यस विषयमा अर्थमन्त्रालयले अनौपचारिक छलफल गरेको थियो । तर यस विषयमा औपचारिक निर्णय भने भइसकेको छैन ।
हालका सञ्चालक मदन दाहालले प्राधिकरणको कामु अध्यक्षको जिम्मेवारी नलिने भनेपछि अर्थमन्त्रालयले नयाँ कर्मचारीलाई सञ्चालकको रुपमा पठाएर अध्ययक्षको समेत जिम्मेवारी दिने गरी तयारी थालेको हो ।
अर्थमन्त्रालय स्रोतका अनुसार प्राधिकरणमा पठाउने नयाँ कर्मचारीको खोजी भइरहेको छ । बीमा प्राधिकरणमा अर्थमन्त्री निकटका सह–सचिव सरहको कर्मचारी पठाइने स्रोतको दमबी छ ।
स्रोतका अनुसार भोलिसम्म बीमा प्राधिकरणमा पत्र पठाउने तयारी भइरहेको छ ।
