काठमाडौं । तिलगङ्गा क्षेत्रमा रहेको बस्ती हटाइएपछि प्रभावित स्थानीय बासिन्दाले पूर्वसम्झौता कार्यान्वयनको माग गर्दै विरोध जनाएका छन्। उनीहरू आज पशुपति क्षेत्र विकास कोषको कार्यालयमा धर्ना बसेका हुन्।
स्थानीयहरूले २०७१ सालमा गुरुयोजना लागू गर्दा तिलगङ्गा क्षेत्र पनि समेटिएको र त्यस क्रममा सट्टाभर्नासम्बन्धी सहमति भएको दाबी गरेका छन्। उनीहरूका अनुसार पशुपति बजार र वनकाली क्षेत्रमा प्रभावितलाई वैकल्पिक जग्गा दिइए पनि तिलगङ्गाका बासिन्दालाई भने सुकुम्बासीको रूपमा वर्गीकृत गरी घर हटाइएको हो।
आफूहरू वैध जग्गाधनी भएको दाबी गर्दै उनीहरूले केही जग्गा गुठी अन्तर्गत र केही रैकर प्रकृतिको रहेको बताएका छन्। साथै, सो क्षेत्रको आम्दानी गुठीका जात्रा तथा धार्मिक गतिविधिमा समेत प्रयोग हुँदै आएको उनीहरूको भनाइ छ।
प्रभावित बासिन्दाका अनुसार पूर्वसम्झौतामा सरकारी मूल्यांकनका आधारमा जग्गा किनबेच गर्ने र सोही मूल्यमा वैकल्पिक जग्गा उपलब्ध गराउने व्यवस्था गरिएको थियो। तर व्यवहारमा त्यसअनुसार मुआब्जा नदिइएको उनीहरूको आरोप छ।
स्थानीयहरूले गोठटार क्षेत्रमा चार आना जग्गा दिने आश्वासन पनि दिइएको दाबी गर्दै, जग्गा उपलब्ध भएको ४५ दिनभित्र स्थान खाली गर्ने सहमति भए पनि त्यसको पालना नगरी घरहरू भत्काइएको बताएका छन्।
