काठमाडौँ। भिजिट भिसा प्रकरणमा गृहमन्त्री रमेश लेखक संलग्न देखिएको भन्दै नेकपा माओवादी केन्द्रले राजीनामा माग गरेको छ । आज बिहान बसेको माओवादी पदाधिकारी बैठकले मन्त्री लेखकले राजीनामा दिनुपर्ने निष्कर्ष सार्वजनिक गरेको छ ।
लेखकले राजीनामा दिएर छानबिनमा सहयोग गर्नुपर्ने माओवादीको निष्कर्ष छ । साथै स्वतन्त्र र निष्पक्ष छानबिनका लागि पनि मन्त्री रमेश लेखकले राजीनामा दिनुको साटो उक्त प्रकरणमा जोगिन अनेक षडयन्त्र भइरहेको प्रवक्ता अग्नि सापकोटाको भनाई छ ।
तर नेपाली कांग्रेसले भने भिजिट भिसा प्रकरणमा गृहमन्त्री रमेश लेखक संलग्न नभएको निष्कर्ष निकालेको छ। कांग्रेसको आज बिहान बसेको पदाधिकारी बैठकले मन्त्री लेखक अनियमिततामा संलग्न नभएको दाबी गरेको हो ।
कांग्रेसले लेखकलाई जबरजस्ती जोडेर अफवाह फैलाउने काम भएको भन्दै जो संलग्न छन् तिनलाई कारबाही गरिनुपर्ने तर गृहमन्त्री लेखकको कुनै संलग्नता नभएको कांग्रेसले उल्लेख गरेको छ । साथै, कांग्रेस बैठकमा गृहमन्त्री रमेश लेखकको राजीनामा माग गर्ने नेताहरू शेखर कोइराला, सुनील शर्मा र राजेन्द्र बजगाईँलाई स्पष्टीकरण सोध्न माग भएको छ।
पार्टीको नीति विपरीत निरन्तर बोल्ने काम गरेको भन्दै उनीहरूसँग स्पष्टीकरण सोध्न माग भएको हो । सभापति शेरबहादुर देउवाले भने यस विषयमा आफूले पछि हेर्ने बताएको शशांक कोइरालाकै भनाई छ । शेखरले गृहमन्त्रीले क्लिन साबित गर्नका निम्ति राजीनामा दिएर अनुसन्धानमा सहयोग गर्नुपर्ने मत राखेका थिए ।
