काठमाण्डौ । साल्ट ट्रेडिङ कर्पोरेशन लिमिटेडले आर्थिक वर्ष २०८१/८२ को मुनाफाबाट सेयरधनीहरूलाई लाभांश वितरण गर्ने निर्णय गरेको छ। कम्पनीको सञ्चालक समितिको माघ २८ गते बसेको बैठकले उक्त निर्णय गरेको हो।
बैठकले आव २०८१/८२ को सञ्चित मुनाफाबाट चुक्ता पुँजीको १० प्रतिशतका दरले बोनस सेयर वितरण गर्ने प्रस्ताव गरेको छ। साथै, बोनस सेयरमा लाग्ने कर प्रयोजनका लागि १६ लाख ३ हजार ५ सय ८४ रुपैयाँ नगद लाभांश वितरण गर्ने निर्णय गरिएको कम्पनीले जनाएको छ।
कम्पनीको उक्त लाभांश प्रस्ताव आगामी वार्षिक साधारणसभाबाट पारित भएपछि मात्र सेयरधनीहरूले प्राप्त गर्नेछन्। साधारणसभा र बुक क्लोज मितिबारे जानकारी भने कम्पनीले पछि सार्वजनिक गर्ने जनाएको छ। साल्ट ट्रेडिङ कर्पोरेशनले नियमित रूपमा मुनाफाबाट सेयरधनीलाई प्रतिफल प्रदान गर्दै आएको छ।
