काठमाडौं । चालु आर्थिक वर्षको तेस्रो त्रैमाससम्म जीवन बीमा क्षेत्रबाट पोलिसी सरेण्डरमार्फत १० अर्बभन्दा बढी बीमा पोलिसी सरेण्डर भएको छ । बीमा क्षेत्रबाट पोलिसी सरेण्डरमार्फत १० अर्ब ४९ करोड ५७ लाख रुपैयाँ बाहिरिएको हो ।
नेपाल बीमा प्राधिकरणका अनुसार चैत मसान्तसम्म कुल ६८ हजार ८५५ वटा पोलिसी सरेण्डर भएको छ भने सरेण्डर भएको पोलिसी संख्या गत आवको सोही अवधिसम्मको तुलनामा १४.१३ प्रतिशत कम हो ।
गत आवको तेस्रो त्रैमाससम्म ८० हजार १८७ वटा पोलिसी अर्थात् ११ अर्ब ९ करोड ७१ लाख रुपैयाँ बराबरको पोलिसी सरेण्डर भएको थियो ।
जीवन बीमा कम्पनीहरुले सरेण्डरमार्फत बाहिरिदै गएको रकम घटाउन थालेको देखिन्छ । पोलिसी संख्या र रकम घटाउँदा जीवन बीमा क्षेत्रमा ६० करोड १४ लाख रुपैयाँ कायम भएको छ ।
पछिल्लो समय जीवन बीमा कम्पनी र नियामक निकाय नेपाल बीमा प्राधिकरणले सरेण्डरदर घटाउन विभिन्न खालका सचेतनामूलक कार्यक्रमहरु आयोजना गर्दै आइरहेका छन् ।
जीवन बीमा कम्पनीहरुमा बीमा पोलिसी नवीकरण नहुनु पनि मुख्य समस्याको रुपमा छ । तेस्रो त्रैमाससम्म ३७ अर्ब ७३ करोड ४ लाख रुपैयाँ बराबरको पोलिसी नवीकरण हुन बाँकी छ । जुन यो रकम गत आवको तुलनामा २.३३ प्रतिशत बढी हो ।
तर कम्पनीहरुले पोलिसी नवीकरण नभएको संख्या भने केही कम गरेका छन् । गत आवको तेस्रो त्रैमाससम्म कुल १२ लाख ४६ हजार ३०१ वटा पोलिसी नवीकरण हुन बाँकी थियो भने चालु आवको यस अवधिसम्म १२ लाख २५ हजार ४५४ वटा पोलिसी नवीकरण हुन बाँकी छ । यसर्थमा व्यतित भएका बीमालेखको संख्या गत आवको तुलनामा १.६७ प्रतिशतले घटेको छ ।
