काठमाडौं । सेयर बजार आइतबार फेरि घटेको छ। शुक्रबार दोहोरो अंकले बढेको बजार आइतबार पुनः ओरालो लागेको हो।
यस दिन नेप्से सूचक २१.६३ विन्दुले घटेर २७१४.८५ अंकमा आएर अडिएको छ। आज ३१६ कम्पनीको १ करोड ३९ लाख ७४ हजार कित्ता शेयर किनबेच हुँदा ६ अर्ब ८३ करोड ६६ लाख रुपैयाँमा सीमित भएको छ ।
आज व्यापार समूह बाहेक अन्य १२ वटै उपसूचक राताम्य भएका छन्। आज विकास बैंक समूहको सर्वाधिक २.२५ प्रतिशतले शेयर मूल्य घटेको छ । यसअघि इन्ट्रा डे कारोबारमा २९ सयभन्दा माथि पुगेको बजार आइतबार घटेर २७ सयको लेबलमा आएको छ ।
सूचक फराकिलो अंकले घट्दा कारोबार रकम पनि न्यून बन्दै गएको छ । कारोबार रकम गत साताको अन्तिम कारोबार दिनको तुलनामा भने केही बढेको हो। बजारमा घटबढ भइरहन्छ । यो सेयर बजारको स्वभाविक र नियमित प्रक्रिया हो । तर समग्रमा भने बजार बुल रनमै रहेकोमा धेरैको सहमति छ ।
त्यसो त चैतका लागि पनि अधिकांश बैंकहरुले ब्याजदर स्थिर राखेका छन् । केहीले घटाएका पनि छन् । यसआधारमा ब्याजदर निकै तल्लो विन्दुमा छ । प्रणालीमा अधिक तरलताको अवस्था छ । केन्द्रीय बैंकले निरन्तरजसो बजारबाट पैसा तानिरहेको छ । यी कुराहरुले अन्ततः सेयर बजारमा सकारात्मक प्रभाव पार्न सक्ने अनुमान गर्न सकिन्छ ।
