काठमाडौँ । काठमाडौँ उपत्यकाका नदी किनार तथा सार्वजनिक जग्गामा रहेका अतिक्रमण हटाउने सरकारी अभियानलाई थप तीव्र बनाइएको छ।
यसै अभियानअन्तर्गत आज बूढानीलकण्ठ नगरपालिका–कपनस्थित साततले क्षेत्रमा अतिक्रमित जग्गामा निर्माण गरिएका संरचनाहरू हटाउन डोजर परिचालन गरिएको छ।
सरकारी तयारीअनुसार लामो समयदेखि खोला तथा सार्वजनिक जग्गा कब्जा गरी बनाइएका टहरा र अन्य संरचना हटाउने कार्य बिहानैदेखि सुरक्षाकर्मीको कडा निगरानीमा सुरु गरिएको हो।
स्थानीय क्षेत्रमा बर्खायाममा हुने डुबान समस्या न्यूनीकरण गर्न र खोलाको प्राकृतिक बहाव पुनःस्थापना गर्न यो कदम चालिएको सम्बन्धित निकायले जनाएको छ।
