काठमाडौँ । मेसेजिङ एप ह्वाट्सएपले आगामी वर्षदेखि पुराना स्मार्टफोनहरूमा आफ्नो सेवा बन्द गर्ने भएको छ । मेटाले सञ्चालन गर्ने उक्त प्लेटफर्मले प्रणाली अपडेट गर्ने क्रममा पुराना एन्ड्रोइड उपकरणहरूलाई सपोर्ट नदिने जनाएको हो ।
समाचारअनुसार सन् २०२६ को सेप्टेम्बर ८ पछि एन्ड्रोइड ६.० भन्दा पुरानो अपरेटिङ सिस्टम भएका फोनहरूमा ह्वाट्सएप सञ्चालन नहुनेछ । विशेषगरी एन्ड्रोइड ५.० र ५.१ संस्करण प्रयोग भइरहेका स्मार्टफोनहरूमा एप पूर्ण रूपमा बन्द हुने उल्लेख गरिएको छ ।
कम्पनीले यो निर्णय अचानक नभई चरणबद्ध रूपमा पुराना डिभाइसहरूको सपोर्ट हटाउने रणनीति अन्तर्गत गरेको जनाएको छ । ह्वाट्सएपका अनुसार पुराना फोनहरूमा नयाँ फिचरहरू राम्रोसँग काम नगर्ने मात्र होइन, सुरक्षा जोखिम पनि बढी हुने भएकाले यस्तो कदम आवश्यक भएको हो ।
यस परिवर्तनको असर विशेषगरी विकासशील देशहरूमा बढी देखिन सक्ने अनुमान गरिएको छ, जहाँ अझै पनि धेरै प्रयोगकर्ताहरू पुराना स्मार्टफोन प्रयोग गरिरहेका छन् । विश्वभर लाखौँ प्रयोगकर्ताहरू पुराना एन्ड्रोइड संस्करणमा निर्भर रहेको बताइन्छ ।
कम्पनीले यस विषयमा आधिकारिक सूचना पनि सार्वजनिक गरिसकेको छ । अबदेखि एन्ड्रोइड ६.० वा त्यसभन्दा माथिका संस्करण भएका डिभाइसहरूमा मात्र ह्वाट्सएप चल्नेछ । यसअघि नै केही पुराना मोडेलहरू जस्तै स्यामसुङ ग्यालेक्सी एस ४, नेक्सस ४ र एलजी जी २ मा सेवा बन्द भइसकेको छ ।
पुराना डिभाइस प्रयोगकर्ताहरूलाई ह्वाट्सएपले पूर्वसूचना पनि पठाइरहेको छ, जसमा निर्धारित मितिपछि एप काम नगर्ने उल्लेख गरिएको छ ।
कम्पनीका अनुसार यो परिवर्तन एपलाई अझ सुरक्षित, छिटो र प्रभावकारी बनाउन गरिएको हो । पुराना अपरेटिङ सिस्टमले नयाँ फिचर सपोर्ट नगर्ने र सुरक्षा अपडेट नपाउने भएकाले डाटा चोरी वा ह्याकिङको जोखिम बढ्ने बताइएको छ ।
यदि प्रयोगकर्ताको फोन एन्ड्रोइड ६.० भन्दा पुरानो छ भने उनीहरूले या त सिस्टम अपडेट गर्ने वा नयाँ फोन प्रयोग गर्ने विकल्प रोज्नुपर्नेछ । साथै, च्याटहरूको ब्याकअप सुरक्षित राख्न पनि सुझाव दिइएको छ ।
