काठमाडौँ । समस्याग्रस्त सहकारी व्यवस्थापन समितिको कार्यालयले विभिन्न सहकारी संस्थाका ठूला ऋणीहरूको नाम सार्वजनिक गर्दै कर्जा तिर्न आग्रह गरेको छ । समितिले ११ वटा समस्याग्रस्त सहकारीका १०९ जना ठूला ऋणीलाई लक्षित गर्दै तत्काल ऋण चुक्ता गर्न निर्देशन दिएको हो ।
कार्यालयका अनुसार वैशाख २३ गतेको निर्णयअनुसार २० सहकारीमध्ये ११ वटा सहकारीका ठूलो परिमाणमा ऋण लिएका व्यक्तिहरूको विवरण सार्वजनिक गरिएको हो । यसअघि पनि १० वटा सहकारीका ९२ जना ठूला ऋणीहरूको नाम सार्वजनिक गरिएको थियो ।
नयाँ सूचीअनुसार सम्बन्धित ऋणीहरूलाई कार्यालयमा सम्पर्क गरी कर्जा चुक्ता गर्न भनिएको छ । अन्यथा प्रचलित कानुनअनुसार असुली प्रक्रिया अघि बढाइने चेतावनी दिइएको छ ।
समितिले बाँकी रहेका ठूला ऋणीहरूको नाम पनि क्रमशः सार्वजनिक गर्दै जाने जनाएको छ ।
सार्वजनिक सूचीमा कृषि विकास बहुदेश्यीय सहकारी, गोरखा सेभिङ एण्ड क्रेडिट, लुनिभा बहुदेश्यीय, हाम्रो कृषि सहकारी, प्यासिफिक सेभिङ एण्ड क्रेडिट, सोसाइटल बचत तथा ऋण, पशुपति सेभिङ एण्ड क्रेडिट, शिवशिखर बहुदेश्यीय, स्ट्यान्डर्ड सेभिङ एण्ड क्रेडिट तथा लालीगुराँस बहुदेश्यीय सहकारी संस्थाका ठूला ऋणीहरू समावेश छन् ।
