काठमाडौँ । वैदेशिक रोजगार विभाग, ताहाचलमा कार्यरत नायब सुब्बा हेमबहादुर मस्राङ्गीविरुद्ध अख्तियार दुरुपयोग अनुसन्धान आयोगले विशेष अदालतमा भ्रष्टाचार मुद्दा दायर गरेको छ ।
आयोगका अनुसार मस्राङ्गीले वैदेशिक रोजगारसम्बन्धी ठगी मुद्दाको प्रक्रिया सहज बनाइदिने, सेवाग्राहीलाई तारिखमा उपस्थित हुन नपर्ने तथा मुद्दा नचल्ने निर्णय गराइदिने आश्वासन दिँदै १५ हजार रुपैयाँ घुस लिएको पुष्टि भएको छ ।
अख्तियारको टङ्गालस्थित टोलीले उनलाई सेवाग्राहीबाट घुस लिइसकेको अवस्थामा नियन्त्रणमा लिएको थियो । त्यसपछि आवश्यक अनुसन्धान पूरा गरी मुद्दा दायर गरिएको हो ।
आयोगले उनीविरुद्ध भ्रष्टाचार निवारण ऐन, २०५९ अनुसार १५ हजार रुपैयाँ बिगो कायम गरी सोही बराबरको जरिवाना र कैद सजायको मागसहित विशेष अदालतमा अभियोगपत्र दायर गरेको जनाएको छ ।
