काठमाडौँ । काठमाडौंको कोटेश्वरस्थित भाटभटेनी सुपरमार्केटमा अस्थिपञ्जर फेला परेको छ। जेन्जी आन्दोलनका क्रममा प्रदर्शनकारीले गत २४ गते सुपरमार्केटमा आगजनी गरेका थिए ।
बुधबार बिहान भाटभटेनीको चौथो तलामा जलेको शवको अस्थिपञ्जर भेटिएको हो। जिल्ला प्रहरी परिसर काठमाडौंका एसपी अपिलराज बोहराले घटना जानकारी दिएका हुन्।
प्रहरीका अनुसार मृतक रामेछापको खाडादेवी गाउँपालिका–६ घर भएका र हाल ललितपुरको च्यासल बस्ने २२ वर्षीय विकास रसाइली हुन्। शव पोष्टमर्टमका लागि टिचिङ अस्पताल लगिएको छ।
एसपी बोहराका अनुसार मृतकको शरीर जलिसकेको हुँदा पहिचान गर्न सकिने अवस्थामा थिएन । नजिकै मृतकको मोबाइल सिम फेला परेको थियो जसबाट उनको पहिचान पुष्टि भएको हो । मृतकका परिवारले पनि प्रहरीमा विकास हराइरहेको जानकारी गराएका थिए।
यसअघि काठमाडौंको चुच्चेपाटीस्थित भाटभटेनीमा पनि ६ वटा अस्थिपञ्जर फेला परेका थिए । यो घटनासँगै जेन्जी आन्दोलनका दौरान ज्यान गुमाउनेको संख्या ७४ पुगेको छ ।
